ಮಧ್ಯಪ್ರದೇಶ: ಇಲ್ಲಿನ ಉಮ್ರೆತ್ ಪೊಲೀಸ್ ಠಾಣೆ ವ್ಯಾಪ್ತಿಯ ಮುಜಾವರ್ ಗ್ರಾಮದಲ್ಲಿ ನಡೆದ ಮದುವೆ ಸಮಾರಂಭವೊಂದು ನಾಟಕೀಯ ಅಂತ್ಯ ಕಂಡಿದೆ. ಹಸೆಮಣೆಯ ಮೇಲೆ ವರನಿಗೆ ಹಾರ ಹಾಕಬೇಕಿದ್ದ ವಧು, ಎಲ್ಲರ ಸಮ್ಮುಖದಲ್ಲೇ ವೇದಿಕೆಯಿಂದ ಕೆಳಗಿಳಿದು ಬಂದು ತನ್ನ ಪ್ರಿಯಕರನ ಕುತ್ತಿಗೆಗೆ ಹಾರ ಹಾಕಿದ ಘಟನೆ ನಡೆದಿದೆ.
ಪರಸಿಯಾದಿಂದ ಬಂದಿದ್ದ ವರನ ಮೆರವಣಿಗೆಯನ್ನು ಅದ್ಧೂರಿಯಾಗಿ ಸ್ವಾಗತಿಸಲಾಗಿತ್ತು. ವೇದಿಕೆಯ ಮೇಲೆ ಹಾರ ವಿನಿಮಯದ (ವರಮಾಲಾ) ಶುಭ ಮುಹೂರ್ತ ಬಂದಾಗ, ವಧು ವರನತ್ತ ಹೆಜ್ಜೆ ಹಾಕುವ ಬದಲು ನೇರವಾಗಿ ಜನಸಂದಣಿಯಲ್ಲಿದ್ದ ತನ್ನ ಪ್ರಿಯಕರನತ್ತ ಓಡಿ ಹೋಗಿ ಆತನಿಗೆ ಹಾರ ಹಾಕಿದ್ದಾಳೆ. ಈ ಅನಿರೀಕ್ಷಿತ ಬೆಳವಣಿಗೆಯಿಂದ ವಿವಾಹ ಮಂಟಪದಲ್ಲಿದ್ದ ಅತಿಥಿಗಳು ಮತ್ತು ವರ ದಿಗ್ಭ್ರಮೆಗೊಂಡಿದ್ದಾರೆ.
ವಧುವಿನ ಈ ಕೃತ್ಯದಿಂದ ಆಕ್ರೋಶಗೊಂಡ ಕುಟುಂಬಸ್ಥರು ಆಕೆಯನ್ನು ಥಳಿಸಿದ್ದಾರೆ. ಇದರಿಂದ ಉಭಯ ಕುಟುಂಬಗಳ ನಡುವೆ ಮಾರಾಮಾರಿ ನಡೆದಿದ್ದು, ಮದುವೆ ಮಂಟಪ ಯುದ್ಧಭೂಮಿಯಾಗಿ ಮಾರ್ಪಟ್ಟಿದೆ. ಕೊನೆಗೆ ವರನು ಮದುವೆಯನ್ನು ನಿರಾಕರಿಸಿ, ಮೆರವಣಿಗೆಯೊಂದಿಗೆ ವಧು ಇಲ್ಲದೆಯೇ ವಾಪಸ್ ತೆರಳಿದ್ದಾನೆ. ವಧು ಮತ್ತು ಆ ಯುವಕನ ನಡುವೆ ದೀರ್ಘಕಾಲದ ಪ್ರೇಮ ಸಂಬಂಧವಿದ್ದು, ಮನೆಯವರ ಒತ್ತಡಕ್ಕೆ ಮಣಿದು ಆಕೆ ಮದುವೆಗೆ ಒಪ್ಪಿಕೊಂಡಿದ್ದಳು ಎಂದು ತಿಳಿದುಬಂದಿದೆ.
