ಮಂಗಳೂರು : ಮನೆಯಲ್ಲೇ ಕುಳಿತು ‘ವರ್ಕ್ ಫ್ರಮ್ ಹೋಮ್’ ಮೂಲಕ ಸುಲಭವಾಗಿ ಹಣ ಗಳಿಸಬಹುದೆಂದು ನಂಬಿಸಿ, ಯುವತಿಯೊಬ್ಬರಿಗೆ ಬಲೆ ಬೀಸಿದ ಆನ್ಲೈನ್ ಸೈಬರ್ ವಂಚಕರು ಹಂತ ಹಂತವಾಗಿ ಬರೋಬ್ಬರಿ ₹9,33,866 ಹಣವನ್ನು ದೋಚಿರುವ ಘಟನೆ ಬೆಳಕಿಗೆ ಬಂದಿದೆ. ಈ ಸಂಬಂಧ 25 ವರ್ಷದ ಯುವತಿ ಮಂಗಳೂರಿನ ಸೈಬರ್ ಅಪರಾಧ (CEN) ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
ವಾಟ್ಸಾಪ್ ಬಳಸುತ್ತಿದ್ದಾಗ ಅಪರಿಚಿತ ಮೊಬೈಲ್ ಸಂಖ್ಯೆಯಿಂದ (8135897645) ಮೆಸೇಜ್ ಬಂದಿದೆ. ‘ಮೀಷಾ’ ಕಂಪನಿಯ ಹೆಚ್ಆರ್ (HR) ಎಂದು ಪರಿಚಯಿಸಿಕೊಂಡ ವಂಚಕ, ಸಂಸ್ಥೆಯಲ್ಲಿ ‘ವರ್ಕ್ ಫ್ರಮ್ ಹೋಮ್ ಡೇಟಾ ಎಂಟ್ರಿ’ ಕೆಲಸವಿದೆ ಎಂದು ನಂಬಿಸಿ ಟೆಲಿಗ್ರಾಂ ಲಿಂಕ್ ಕಳುಹಿಸಿದ್ದಾನೆ.
ಟೆಲಿಗ್ರಾಂ ಲಿಂಕ್ ಮೂಲಕ ಜಾಯಿನ್ ಆದ ಯುವತಿಗೆ ದಿನಕ್ಕೆ 20 ಟಾಸ್ಕ್ ಪೂರ್ಣಗೊಳಿಸಿದರೆ 200 ರೂ. ನೀಡುವುದಾಗಿ ಆಮಿಷ ಒಡ್ಡಲಾಗಿದೆ. ಮೊದಲ ದಿನ ನೀಡಿದ ಟಾಸ್ಕ್ ಪೂರ್ಣಗೊಳಿಸಿದ್ದಕ್ಕೆ ಯುವತಿಯ ಖಾತೆಗೆ ನಿಜಕ್ಕೂ 200 ರೂ. ಜಮೆ ಮಾಡುವ ಮೂಲಕ ವಂಚಕರು ನಂಬಿಕೆ ಹುಟ್ಟಿಸಿದ್ದಾರೆ.
ಮರುದಿನ 13 ಟಾಸ್ಕ್ಗಳನ್ನು ಪೂರ್ಣಗೊಳಿಸಲು ಯುವತಿಗೆ ಸಾಧ್ಯವಾಗಿಲ್ಲ. ಈ ವೇಳೆ ‘ಅಮರ್ಜೀತ್ ಕುಮಾರ್’ (@tutorcode321) ಎಂಬ ಮತ್ತೊಂದು ಟೆಲಿಗ್ರಾಂ ಐಡಿಯಿಂದ ಸಂಪರ್ಕಿಸಿದ ಸೈಬರ್ ಚೋರರು, ಟಾಸ್ಕ್ ಮುಂದುವರಿಸಲು ಗೂಗಲ್ ಪೇ (Google Pay) ಮೂಲಕ ₹3,000 ಹಣ ಹೂಡಿಕೆ ಮಾಡುವಂತೆ ತಿಳಿಸಿದ್ದಾರೆ.
ಹಣ ಪಾವತಿಸಿದರೂ ಟಾಸ್ಕ್ ಪೂರ್ಣಗೊಳ್ಳದ ಕಾರಣ, ಹೂಡಿಕೆ ಮಾಡಿದ ಹಣವನ್ನು ವಾಪಸ್ ಕೇಳಿದಾಗ ವಂಚಕರು ಹೊಸ ಹೊಸ ಕಾರಣಗಳನ್ನು ಹೇಳಿದ್ದಾರೆ. ಸಿಲುಕಿಕೊಂಡ ಹಣ ವಾಪಸ್ ಬರಬೇಕಾದರೆ ಹೆಚ್ಚುವರಿ ಮೊತ್ತ ಪಾವತಿಸಬೇಕೆಂದು ನಂಬಿಸಿ ವಿವಿಧ ಬ್ಯಾಂಕ್ ಖಾತೆಗಳನ್ನು ನೀಡಿದ್ದಾರೆ.
ಇದನ್ನು ನಂಬಿದ ಯುವತಿ, ಸೆಪ್ಟೆಂಬರ್ 12 ರಿಂದ ಸೆಪ್ಟೆಂಬರ್ 17 ರವರೆಗೆ ಅಪರಿಚಿತರು ನೀಡಿದ ವಿವಿಧ ಬ್ಯಾಂಕ್ ಖಾತೆಗಳಿಗೆ ಒಟ್ಟು ₹9,33,866 ಹಣವನ್ನು ಹಂತ
ಹಂತವಾಗಿ ವರ್ಗಾವಣೆ ಮಾಡಿದ್ದಾರೆ. ಕೊನೆಗೆ ಎಷ್ಟು ಹಣ ಹಾಕಿದರೂ ವಾಪಸ್ ಬಾರದೆ, ತಾನು ಮೋಸ ಹೋಗಿರುವ ಅರಿವಿಗೆ ಬಂದ ತಕ್ಷಣ ಯುವತಿ ಪೊಲೀಸರ ಮೆಟ್ಟಿಲೇರಿದ್ದಾರೆ. ಪ್ರಕರಣ ದಾಖಲಿಸಿಕೊಂಡಿರುವ ಸೈಬರ್ ಪೊಲೀಸರು ತನಿಖೆ ತೀವ್ರಗೊಳಿಸಿದ್ದಾರೆ.
ಸೈಬರ್ ವಂಚನೆಗೆ ಒಳಗಾದರೆ ತಕ್ಷಣವೇ ಏನು ಮಾಡಬೇಕು? ನೀವು ಅಥವಾ ನಿಮ್ಮ ಪರಿಚಯದವರು ಸೈಬರ್ ವಂಚನೆಗೆ ಒಳಗಾದರೆ, ತಡಮಾಡದೆ ಕೂಡಲೇ 1930 (Cyber Crime Helpline) ನಂಬರ್ಗೆ ಕರೆ ಮಾಡಿ ದೂರು ದಾಖಲಿಸಿ. ಅಥವಾ http://www.cybercrime.gov.in ವೆಬ್ಸೈಟ್ ಮೂಲಕ ದೂರು ನೀಡಿ ನಿಮ್ಮ ಹಣವನ್ನು ರಕ್ಷಿಸಿಕೊಳ್ಳಿ
