ಮಂಗಳೂರಿನಿಂದ ಪುತ್ತೂರಿಗೆ ಬರುತ್ತಿದ್ದ ಖಾಸಗಿ ಬಸ್ಸಿನಲ್ಲಿ ಸೆಪ್ಟೆಂಬರ್ 20 ರಂದು ವೃದ್ಧ ಮಹಿಳೆಯೋರ್ವರು ತನ್ನ ಪಕ್ಕದಲ್ಲಿ ಕುಳಿತಿದ್ದ ಮಹಿಳೆಯ ಬ್ಯಾಗಿನಿಂದ ಪರ್ಸ್ ಕಳ್ಳತನ ಮಾಡುತ್ತಿದ್ದ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ.
ಪರ್ಸ್ ಕಳೆದುಕೊಂಡಿರುವ ಮಹಿಳೆ ಪುತ್ತೂರು ಯೋಜನಾಧಿಕಾರಿ ಸುಕನ್ಯಾ ಎಂದು ತಿಳಿದುಬಂದಿದೆ. ಅವರು ಮಂಗಳವಾರ ಕಲ್ಲಡ್ಕದಿಂದ ಬಸ್ಸಿನಲ್ಲಿ ಹತ್ತಿದ್ದು ಪುತ್ತೂರಿನಲ್ಲಿ ಇಳಿಯುವ ಸಂದರ್ಭ ಬ್ಯಾಗಿನೊಳಗೆ ಇದ್ದ ಪರ್ಸು ಕಾಣೆಯಾಗಿರುವ ಬಗ್ಗೆ ತಿಳಿದು ಪರ್ಸ್ ಕಳ್ಳತನವಾಗಿರುವ ಬಗ್ಗೆ ಪುತ್ತೂರು ಪೊಲೀಸರಿಗೆ ದೂರು ನೀಡಿದ್ದಾರೆ.
ಪೊಲೀಸರು ಬಸ್ಸಿನ ವಿವರ ಸಂಗ್ರಹಿಸಿದಾಗ ಮಹೇಶ್ ಬಸ್ಸು ಇದಾಗಿದ್ದು ಬಸ್ಸಿನಲ್ಲಿ ಸಿಸಿ ಕ್ಯಾಮೆರಾ ಅಳವಡಿಸಿದ ಕಾರಣ ಸಿಸಿಟಿವಿಯನ್ನು ಪರಿಶೀಲಿಸಿದಾಗ ಬೊಳುವಾರು ಬಳಿ ಬಸ್ಸಿನಲ್ಲಿ ಸುಕನ್ಯಾ ರವರ ಬಳಿ ಕುಳಿತಿದ್ದ ಕಳ್ಳಿ ಬ್ಯಾಗಿನಿಂದ ಪರ್ಸ್ ಎಗರಿಸುವ ವಿಡಿಯೋ ಕಂಡು ಬಂದಿದೆ. ಘಟನೆಯ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದು ಕಳ್ಳತನದ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ.
