ಮುಲ್ಕಿ: ನಗರ ಪಂಚಾಯಿತಿಯ ಒಳ ರಸ್ತೆಯ ಪಂಚಮಹಲ್ ರಸ್ತೆಯ ಪುಂಡಲಿಕ ಕಾಮತ್ ಅಂಗಡಿಯ ತಿರುವಿನಲ್ಲಿ 407 ಟೆಂಪೋ ಚಾಲಕನ ನಿಯಂತ್ರಣ ತಪ್ಪಿ ರಸ್ತೆ ಬದಿಯ ಚರಂಡಿಯಲ್ಲಿ ಹೂತು ಹೋಗಿ ಸುಮಾರು 2 ಗಂಟೆಗೂ ಹೆಚ್ಚು ಕಾಲ ರಸ್ತೆ ಸಂಚಾರ ಅಸ್ತವ್ಯಸ್ತಗೊಂಡಿತು. ವೆಂಕಟರಮಣ ದೇವಸ್ಥಾನದ ಕಡೆಯಿಂದ ಮುಲ್ಕಿ ಕೆ ಎಸ್ ರಾವ್ ನಗರದ ಕಡೆ ಕೂಲಿ ಕಾರ್ಮಿಕರನ್ನು ಹೇರಿಕೊಂಡು ಕಾಂಕ್ರೀಟ್ ಮಷೀನ್ ಸಾಗಾಟ ಮಾಡುತ್ತಿದ್ದ ಟೆಂಪೋ ರಸ್ತೆ ತಿರುವಿನಲ್ಲಿ ಚಕ್ರ ಕೂತು ಹೋಗಿದೆ. ಈ ಸಂದರ್ಭ ಟೆಂಪೋ ಹಿಂದುಗಡೆ ಕುಳಿತಿದ್ದ ಮಹಿಳೆಯೊಬ್ಬರು ಪವಾಡ ಸದೃಶ ಪಾರಾಗಿದ್ದಾರೆ. ಬಳಿಕ ಜಾಕ್ ಅಳವಡಿಸಿ ಟೆಂಪೋವನ್ನು ಮೇಲೆತ್ತಲಾಯಿತು. ಈ ಭಾಗದ ಅಪಾಯಕಾರಿ ರಸ್ತೆ ತಿರುವಿನಲ್ಲಿ ಅನೇಕ ಸಣ್ಣಪುಟ್ಟ ಅಪಘಾತಗಳು ಸಂಭವಿಸಿದ್ದು ರಸ್ತೆ ಅಗಲೀಕರಣ ಗೊಳಿಸಬೇಕು ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.
