ರಾಜ್ಯಾದ್ಯಂತ ತೀವ್ರ ಕುತೂಹಲ ಕೆರಳಿಸಿರುವ ಬೆಳ್ತಂಗಡಿ ತಾಲೂಕಿನ ಪಾಂಗಳದ ಸೌಜನ್ಯ ಅತ್ಯಾಚಾರ ಮತ್ತು ಕೊಲೆ ಪ್ರಕರಣದ ತನಿಖೆಯನ್ನು ಎಸ್ಐಟಿ (SIT) ಮತ್ತಷ್ಟು ಚುರುಕುಗೊಳಿಸಿದೆ. ಪ್ರಕರಣದ ವೈಜ್ಞಾನಿಕ ಹಾಗೂ ತಾಂತ್ರಿಕ ಅಂಶಗಳನ್ನು ಪರಿಶೀಲಿಸಲು ಎಸ್ಐಟಿ ಮುಖ್ಯಸ್ಥ ಚೇತನ್ ಸಿಂಗ್ ರಾಠೋಡ್ ಅವರು ಇದೀಗ ಮೂವರು ನುರಿತ ವಿಧಿವಿಜ್ಞಾನ (FSL) ವೈದ್ಯರನ್ನೊಳಗೊಂಡ ವಿಶೇಷ ‘ಮೆಡಿಕಲ್ ಬೋರ್ಡ್’ ರಚನೆ ಮಾಡಿದ್ದಾರೆ. ಈ ತಂಡದಲ್ಲಿ ಬೆಂಗಳೂರು, ಹಾವೇರಿ ಮತ್ತು ಬೆಳಗಾವಿಯ ತಲಾ ಒಬ್ಬೊಬ್ಬ ತಜ್ಞ ವೈದ್ಯರಿದ್ದು, ಓರ್ವ ಮಹಿಳಾ ವೈದ್ಯೆ ಹಾಗೂ ಇಬ್ಬರು ಪುರುಷ ವೈದ್ಯರನ್ನು ಒಳಗೊಂಡಿದೆ ಎಂದು ಎಸ್ಐಟಿ ಮುಖ್ಯಸ್ಥರು ಮಾಹಿತಿ ನೀಡಿದ್ದಾರೆ.
ಈ ನೂತನ ಮೆಡಿಕಲ್ ಬೋರ್ಡ್ ತಂಡವು ಶೀಘ್ರದಲ್ಲೇ ಸೌಜನ್ಯ ಶವ ಪತ್ತೆಯಾಗಿದ್ದ ಧರ್ಮಸ್ಥಳದ ನೇತ್ರಾವತಿ ಸ್ನಾನಘಟ್ಟದ ಮಣ್ಣಸಂಕದ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಲಿದೆ. ಘಟನೆ ನಡೆದ ಸಂದರ್ಭದಲ್ಲಿ ಶವ ಪತ್ತೆಯಾದ ಜಾಗದಲ್ಲಿ ತೆಗೆಯಲಾಗಿದ್ದ ಫೋಟೋ ಮತ್ತು ವಿಡಿಯೋ ದಾಖಲೆಗಳನ್ನು ಹಿಡಿದು, ಅದೇ ಸ್ಥಳದಲ್ಲಿ ನಿಂತು ವೈದ್ಯರ ತಂಡವು ಸೂಕ್ಷ್ಮವಾಗಿ ವಿಶ್ಲೇಷಣೆ ನಡೆಸಲಿದೆ.
ಪ್ರಮುಖವಾಗಿ, ಸೌಜನ್ಯಳನ್ನು ಶವ ಪತ್ತೆಯಾದ ಮಣ್ಣಸಂಕದ ಸ್ಥಳದಲ್ಲೇ ಕೊಲೆ ಮಾಡಲಾಗಿತ್ತೇ ಅಥವಾ ಬೇರೆ ಎಲ್ಲಾದರೂ ಹತ್ಯೆಗೈದು ಬಳಿಕ ಸಾಕ್ಷ್ಯ ನಾಶಪಡಿಸಲು ಇಲ್ಲಿ ತಂದು ಶವ ಎಸೆಯಲಾಗಿತ್ತೇ ಎಂಬ ಮಹತ್ವದ ಪ್ರಶ್ನೆಗೆ ಈ ತಂಡವು ವೈಜ್ಞಾನಿಕ ಉತ್ತರವನ್ನು ಕಂಡುಕೊಳ್ಳಲಿದೆ. ಮೆಡಿಕಲ್ ಬೋರ್ಡ್ನ ಈ ಸ್ಥಳ ಪರಿಶೀಲನೆ ಮತ್ತು ವರದಿಯು ಪ್ರಕರಣದ ಮುಂದಿನ ತನಿಖೆಯಲ್ಲಿ ಅತ್ಯಂತ ನಿರ್ಣಾಯಕ ಪಾತ್ರ ವಹಿಸಲಿದೆ.




